कृषीभूषण दत्तात्रय काळे यांची माहिती; शरद पवारांची उपस्थिती
तरुण भारत संवाद प्रतिनिधी / सोलापूर
उत्तर सोलापूर तालुक्यातील नान्नजचे प्रगतशील आणि प्रयोगशील शेतकरी स्वर्गिय नानासाहेब काळे यांच्या परिवाराने उत्पादीत केलेल्या किंगबेरी या नव्या द्राक्ष वाणाचा राष्ट्राला लोकार्पण सोहळा शनिवार दि. १३ फेब्रुवारी रोजी सकाळी ११ वा. नान्नज येथील द्राक्ष बागेत देशाचे माजी कृषी मंत्री शरद पवार यांच्या हस्ते होणार असल्याची माहिती कृषिभूषण दत्तात्रय नानासाहेब काळे यांनी पत्रकार परिषदेत दिली.
देशातील द्राक्ष बागायत क्षेत्रातील एकूण ६० टक्के द्राक्षांचे वाण हे सोलापूरच्या नान्नज येथील काळे परिवाराने निर्माण केलेल्या सोनाका, शरद सिडलेस या द्राक्ष वाणातूनच निर्माण झाले ही बाब सोलापूरच्या दृष्टीने अभिमानस्पद आहे. यातूनच अनेक शेतकऱयांनी नवनवीन वाण उत्पादीत करण्याची प्रेरणा घेवून द्राक्षबागांचे क्षेत्र मोठ्या प्रमाणात वाढवत अनेक वाण निर्माण केले. याचे सर्व श्रेय नानासाहेब काळे परिवाराला आहे. द्राक्षाचे तीन पेटंट घेवून चौथे पेटंट नव्याने विकसित केलेल्या किंग बेरीसाठी लवकरच पेटंट मिळणार असून अशा प्रकारे पेटंट घेणारे कृषीभूषण दत्तात्रय नानासाहेब काळे हे देशातील एकमेव शेतकरी आहेत.
या कार्यक्रमाला माजी केंद्रीय गृहमंत्री सुशीलकुमार शिंदे, जलसंपदामंत्री जयंत पाटील, पालकमंत्री दत्तात्रय भरणे, कृषीमंत्री दादा भुसे, सहकार व पणन मंत्री शामराव पाटील, सोलापूर जिल्हा परिषदेचे विरोधी पक्षनेते बळीराम काका साठे यांची उपस्थिती राहणार आहे, तर सोलापूरचे खासदार डॉ. जयसिध्देश्वर शिवाचार्य महास्वामी, आ. बबनराव शिंदे, आ. विजयकुमार देशमुख, आ. सुभाष देशमुख, आ. प्रणिती शिंदे, आ. यशवंत माने, आ. संजय शिंदे, आ. प्रशांत परिचारक, आ. अनिल बाबर, आ. रोहित पवार उपस्थित राहणार आहेत. या पत्रकार परिषदेला चेतन काळे, प्रल्हाद काशीद आणि रविंद्र पाटील उपस्थित होते.
किंगबेरीची वैशिष्टे
ह्या व्हरायटीची पाने स्वॉफ्ट असल्यामुळे सायटोकायनीनची निर्मिती चांगली होते. त्यामुळे फळधारणा उत्तम होते. झाडावरील प्रत्येक काडीला हमखास २ ते ३ घड लागतात. पानांचा आकार मोठा व पानांचा रंग लाईट हिरवा. काडीपासून घडाचा देठ लांब, दोन पाकळ्यातील अंतर जास्त असल्यामुळे थिनींगचा खर्च कमी येतो. घडांचा दांडा लुसलशीत असल्यामुळे संजिवकांना प्रतिसाद चांगला मिळतो. नैसर्गिक लांबी व फुगवण असल्यामुळे संजिवकांचा वापर कमी त्यामुळे कोणतीही विकृती निर्माण होत नाही. घडातील द्राक्षमणी एकसारख्या आकाराचे मण्यांची लांबी ४५ ते ५० मिमि पर्यत व जाडी २४ ते २५ मिमि पर्यत तसेच खाण्यास क्रंन्ची. भारतीय बाजारपेठ व परदेशी निर्यातीसाठी इतर रंगीत द्राक्ष वाणांपेक्षा २५ ते ३० टक्के ज्यास्त दर मागील वषी मिळाला. एकरी १२ ते १४ टन एकूण उत्पन्न देणारे हे पहिलेच रंगीत किंग बेरी द्राक्ष वाण आहे.