प्रतिनिधी / कुपवाड
कुपवाडमधील अवधूत कॉलनीत राहणाऱ्या तरुणांनी येथील मैदानावर वाढदिवसानिमित्त तलवारीने केक कापून वाढदिवस साजरा केल्याचा प्रकार मंगळवारी रात्री घडला. याप्रकरणी कुपवाड पोलिसांनी तिघाजणांच्या विरोधात गुन्हा दाखल केला आहे. यामध्ये निखील मोहन कदम (२४,रा.बामणोली), आकाश प्रताप काटकर (२२) व अवधूत केरबा सदामते (२१, दोघे रा.सावळी) अशी गुन्हा दाखल झालेल्यांची नावे आहेत. यापैकी मुख्य संशयित निखील कदम याच्यावर कुपवाड एमआयडीसीतील एका उद्योजकाची २० लाखांची फसवणूक केल्याप्रकरणी गुन्हा दाखल आहे.
याबाबत पोलिसांनी दिलेल्या माहितीनुसार, तिघांपैकी निखील कदम याचा मंगळवारी वाढदिवस होता. यानिमित्ताने केक कापून वाढदिवस साजरा करण्यासाठी निखील कदम, आकाश काटकर व अवधूत सदामते तिघेजण मंगळवारी रात्री कुपवाडच्या माळरानावरील अवधूत काॅलनीतील खुल्या मैदानावर एकत्रित जमले. यावेळी वाढदिवसानिमित्त काही तरुण तलवारीने केक कापत असल्याची माहिती कुपवाड पोलिसांना मिळाली. त्यानुसार सपोनि नीरज उबाळे यांच्या मार्गदर्शनाखाली पथकाने त्याठिकाणी छापा टाकला. यावेळी निखील कदम याच्या वाढदिवसानिमित्त तलवारीने केक कापत असताना तिघेही सापडले. पोलिसांनी तीघांना ताब्यात घेऊन गुन्हे दाखल केले. यावेळी केक कापण्यासाठी आणलेली तलवार व मोटारसायकल (एम.एच.१० सी.पी.९१६०) मिळून ५२ हजार रुपयांचा मुद्देमाल पोलिसांनी जप्त केला. अधिक तपास कुपवाड पोलिस करीत आहेत.