प्रतिनिधी / कुरुंदवाड
कोरोना कालावधीतील वीज बिल माफ करावे. या मागणीसाठी कुरुंदवाड शहरातील सर्वपक्षीय कार्यकर्त्यांनी येथील महावितरण कार्यालयासमोर वीज बिलांची होळी करून बोंब ठोकून आंदोलन केले. यावेळी काही कार्यकर्त्यांनी महावितरण कार्यालयात घुसण्याचा प्रयत्न केला यावेळी जमावाला पोलिसांनी रोखून धरले या आंदोलनप्रसंगी काही काळ तणावाचे वातावरण निर्माण झाले होते.
यावेळी बोलताना विश्वास बालिघाटे म्हणाले, लॉकडाऊन काळातील वीजबिल माफ करण्याचे आश्वासन सरकारने दिले होते. मात्र, अचानक नामदार राऊत यांनी वीज बिल माफ होणार नाही असे सांगितल्यानंतर राज्यात संतप्त प्रतिक्रिया उमटत आहेत. लॉकडाऊन काळात कोणाच्या हाताला काम नव्हते. त्यामुळे शासनाकडून विज बिल जोपर्यंत माफ होत नाही तोपर्यंत हा आंदोलनाचा लढा तीव्र करण्यात येणार असल्याचा इशारा यावेळी दिला. यावेळी सर्व कार्यकर्त्यांनी महावितरण कार्यालयासमोर बोंबठोक आंदोलन करत वीज बिलांची होळी केली व सरकारचा निषेध केला.
यावेळी रघु नाईक, योगेश जिवाजे, बंडु उमडाळे,अविनाश गुदले, दीपक पोमाजे,अमर कुंभार,बंडु कुंभार,बंडु पाटील,नितीन यांसह कार्यकर्ते उपस्थित होते.