प्रतिभा आणि बुद्धिमत्ता वयावर अवलंबून असत नाही, असे एक वचन आहे. त्याचे प्रत्यंतर दिल्लीतील आर्यमित्र पटेरिया आणि प्रणत शर्मा या दोन विद्यार्थ्यांनी आणून दिले आहे. हे दोन्ही विद्यार्थी सध्या बारावीच्या वर्गात शिकत आहेत. त्यांनी कृत्रिम बुद्धिमत्ता किंवा आर्टिफिशियल इंटेलिजन्सकरिता अतिशय उपयुक्त ठरेल, अशी प्रभावी संगणकीय भाषा शोधून काढली आहे. त्यांची ही प्रोगॅमिंग भाषा अनेक आयटी तज्ञांना भलतीच आवडली आहे. या भाषेला त्यांनी ‘यलो सबमरीन’ असे सांकेतिक नाव दिले आहे. या भाषेमुळे कृत्रिम बुद्धिमत्तेचे स्क्रिप्टिंग तयार करताना अतिशय अनुकूलता प्राप्त होते. तसेच अतिशय अचूकपणे हे स्क्रिप्टिंग तयार करता येते. ही प्रथमच भारतीय निर्मितीची कृत्रिम बुद्धिमत्ता भाषा आहे.
आर्यमित्र पटेरिया यांनी यलो सबमरीन इनिशिएटिव्ह नामक एक कंपनीच स्थापन केली असून या भाषेचा ते प्रसार करीत आहेत. सध्या कृत्रिम बुद्धिमत्तेसाठी जी संगणकीय भाषा उपयोगात आणली जाते ती 20 ओळींच्या संचांची जटिल रचनेची भाषा आहे. मात्र, या दोघांनी निर्माण केलेली भाषा अवघ्या दोन ओळींच्या सुलभ आणि सोप्या संचांची आहे. त्यामुळे ती लक्षात ठेवणे आणि उपयोगात आणणे यासाठी सुलभ आहे. तसेच त्यामुळे वेळ आणि कॉम्प्युटरच्या स्मरणशक्तीमधील (मेमरी) जागाही वाचते. परिणामी संगणकाची क्षमता पुरेपूर उपयोगात आणली जाते. शिवाय या भाषेत मल्टीपल टायपोग्राफी म्हणजेच वेगवेगळय़ा लिप्यांचीही सोय आहे. त्यामुळे इंग्रजीवरील अवलंबित्व मोठय़ा प्रमाणावर कमी होणार आहे. आर्यमित्र यांनी यलो सबमरीनचे पहिले संस्करण संस्कृत, हिंदी आणि इंग्रजी भाषेत केले आहे. याबद्दल त्यांचे विशेष कौतुक होत आहे.
ही भाषा वेबसाईटवरून डाऊनलोड करता येण्यासारखी आहे. www.yellowsubmarine.org.in ही त्यांची वेबसाईट आहे. आर्यमित्र यांनी एवढय़ा छोटय़ा वयातच ‘एआय-मशीन लर्निंग’ या विषयावर एक पुस्तकही लिहिले आहे. ते डिसेंबरमध्ये बाजारात येणार आहे. या भाषेची ख्याती नासापर्यंत पोहोचली असून नासासुद्धा या भाषेचे परीक्षण करण्याच्या तयारीत आहे. एकंदर या दोन विद्यार्थ्यांनी स्वतःबरोबरच भारताचे नावसुद्धा अत्याधुनिक संगणकीय तंत्रज्ञानात जगभरात गाजविले आहे.