बेंगळूर/प्रतिनिधी
राज्याचे मुख्यमंत्री बी.एस. येडियुरप्पा यांनी सोमवारी दुपारी मंत्रीमंडळ बैठकीत १४ दिवसांच्या राज्यव्यापी बंदची घोषणा केल्यानंतर बेंगळूरमधील प्रवासी कामगार, विद्यार्थी व कर्मचारी शहरातील मॅजेस्टिक बसस्थानकात दाखल झाले.
दरम्यान कर्नाटक राज्य मार्ग परिवहन महामंडळाचे (केएसआरटीसी) व्यवस्थापकीय संचालक शिवयोगी सी. कलसद यांनी मंगळवारी सकाळी मॅजेस्टिक बस टर्मिनलमध्ये प्रवाशांसाठी असलेल्या बस सुविधांची पाहणी केली. दरम्यान केएसआरटीसीने बेंगळूरहून अनेक ठिकाणी जाण्यासाठी ५०० जादा बसेस चालविण्याचा निर्णय घेतला आहे.
परिवहन मंत्री लक्ष्मण सावदी म्हणाले की, मंगळवारी शहर टर्मिनलवर जणाऱ्या प्रवाशांची संख्या मोठी असेल अशी अपेक्षा आहे. मंगळवारी तीन राज्य महामंडळांनी सुमारे १२,००० बसेसची व्यवस्था केली आहे. केएसआरटीसीच्या एमडीसमवेत उपमुख्यमंत्री आणि परिवहन मंत्री लक्ष्मण सावडी यांनीही परिस्थितीचा आढावा घेण्यासाठी मॅजेस्टिक बस टर्मिनलला भेट दिली.