सिडनी : भारताविरुद्ध होणाऱया वनडे व टी-20 मालिकेसाठी ऑस्ट्रेलियाने केन रिचर्डसनच्या जागी वेगवान गोलंदाज अँड्रय़ू टायची निवड केली आहे. कोरोना महामारीच्या काळात कुटुंबीयांसमवेत राहता यावे यासाठी रिचर्डसनने या दौऱयातून माघार घेतल्याने हा निर्णय घेण्यात आला आहे.
पत्नी व नुकत्याच जन्मलेल्या मुलासमवेत राहता यावे यासाठी रिचर्डसनने या मालिकेतून माघार घेत असल्याचा निर्णय निवड समितीला कळविला. त्याने घेतलेला निर्णय कठीण होता. पण संपूर्ण संघ व निवड समितीने त्याच्या निर्णयाला पाठिंबा दर्शविला आहे, असे निवड समिती सदस्य टेव्हर हॉन्स यांनी सांगितल्याचे क्रिकेट ऑस्ट्रेलियाने निवेदनाद्वारे सांगितले. ‘केनला पत्नी नायकी व मुलासमवेत ऍडलेडमध्येच राहण्याची इच्छा होती. आम्ही नेहमीच खेळाडूंना व त्यांच्या कुटुंबियांना पाठिंबा देत असतो आणि सध्याच्या आव्हानात्मक परिस्थितीत तर ते अत्यंत आवश्यक आहे,’ असे हॉन्स म्हणाले.
ऍडलेडमध्ये कोव्हिड 19चा पुन्हा उद्रेक झाल्यामुळे रिचर्डसनने माघारीचा निर्णय घेतला असावा, असे मानले जात आहे. या उद्रेकामुळे दक्षिण ऑस्ट्रेलियातील स्थितीवर तसेच सीमाबंदीमुळे देशभरात घालण्यात आलेल्या निर्बंधावर लक्ष ठेवून असल्याचे सीएचे हंगामी प्रमुख कार्यकारी निक हॉकली यांनी दोन दिवसांपूर्वी म्हटले होते.