जर्मनीच्या वैज्ञानिकांना मिळाले यश : उंदरांवरील चाचण्या यशस्वी ठरल्यानंतर आता माणसांना देण्याची तयारी
कोरोनाशी लढण्यात प्रभावी असणारी अँटीबॉडी जर्मनीच्या वैज्ञानिकांनी शोधून काढली आहे. या अँटीबॉडीद्वारे पॅसिव्ह व्हॅक्सिन तयार केली जाऊ शकते. पॅसिव्ह व्हॅक्सिन अंतर्गत वैज्ञानिक या अँटीबॉडीला कोरोनाबाधिताच्या शरीरात पोहोचवतील. ही अँटीबॉडी कोरोनाशी लढण्यास मदत करणार आहे.
600 प्रकारच्या अँटीबॉडीज
संशोधन करणाऱया जर्मन सेंटर फॉर न्यूरोडिजेनेरेटिव्ह डिसिजच्या वैज्ञानिकांनी कोरोनातून बरे झालेल्या लोकांच्या रक्तातून 600 प्रकारच्या अँटीबॉडीज वेगळय़ा केल्या आहेत. प्रयोगशाळेतील चाचण्यानंतर यातील काही सक्रीय अँटीबॉडीज कोरोनाशी लढण्यास प्रभावी ठरू शकतात, असे दिसून आले. त्यातील एका अँटीबॉडीला प्रयोगशाळेत सेल कल्चरच्या मदतीने कृत्रिम स्वरुपात तयार करण्यात आले आहे.
अँटीबॉडीचे कार्यस्वरुप
प्रयोगशाळेत तयार करण्यात आलेली न्यूट्रिलायजिंग अँटीबॉडी कोरोनाला बंदिस्त करण्याचे काम करते. ही अँटीबॉडी कोरोनाला शरीरात घुसणे आणि वाढण्याच्या प्रक्रियेला आळा घालते. या अँटीबॉडीच्या मदतीने शरीरातील इम्यून पेशी कोरोनाला नष्ट करत असल्याचा दावा संशोधकांनी केला आहे.
उंदरांवर प्रभाव
ही अँटीबॉडी उंदरांवर झालेल्या चाचण्यांमध्ये अत्यंत प्रभावी दिसून आली आहे. या अँटीबॉडीचे दोन प्रकारचे प्रभाव दिसून आले आहेत. कोरोनाबाधित असलेल्या उंदरांमध्ये याचा तुलनेत सौम्य प्रभाव दिसून आला. तर संसर्गापूर्वी अँटीबॉडी देण्यात आलेले उंदिर अत्यंत तंदुरुस्त दिसून आले आहे. जर्नल सेलमध्ये प्रकाशित संशोधनानुसार उंदरांमधील पेशी मानवी पेशींशी मिळत्याजुळत्या आहेत. याचमुळे या अँटीबॉडीला रुग्णांसाठीही प्रभावी मानण्यात आले आहे.
अँटीबॉडी म्हणजे काय?
प्रोटीनने तयार झालेल्या या विशेष प्रकारच्या इम्यून पेशी असतात, ज्यांना बी-लिम्फोसाइट म्हटले जाते. शरीरात एखादी बाहेरील गोष्ट (फॉरेन बॉडीज) पोहोचल्यावर त्या सक्रीय होतात. जीवाणू किंवा विषाणूच्या विषारी पदार्थांना निष्क्रीय करण्याचे काम याच अँटीबॉडी करतात. अशाप्रकारे त्या शरीराला प्रतिरक्षण देत सर्वप्रकारच्या रोगाणूंना निष्प्रभ करतात.
एकच डोस ठरला प्रभावी
अमेरिकेतील औषध कंपनी जॉन्सन अँड जॉन्सनकडून कोरोनावरील लस विकसित करण्यात आली आहे. सध्या या लसीच्या चाचण्या सुरू आहेत. एका अहवालानुसार याच्या एकाच डोसचे निष्कर्ष अत्यंत चांगले राहिले आहेत आणि यामुळे रोगप्रतिकारकशक्ती मजबूत झाली आहे.
सेफ्टी प्रोफाइल आणि इम्युन सिस्टीमला मजबूत करण्याच्या दृष्टीने सिंगल डोसची चाचणी करण्यात आली आहे. या निष्कर्षामुळे पुढील क्लीनिकल ट्रायल्समध्ये मदत मिळणार आहे. या लसीचे नाव ‘एडी26.कोव2.एस’ आहे. कोविड संक्रमणापासून वाचविण्यासाठी ही लस उपयुक्त ठरणार आहे. अमेरिकेत विकसित झालेली आणि क्लीनिकल ट्रायल्स सुरू असलेली ही चौथी लस आहे. वर्षाच्या अखेरपर्यंत अमेरिकेत 10 कोटी डोस उपलब्ध असतील, असे आश्वासन अध्यक्ष डोनाल्ड ट्रम्प यांनी दिले आहे. 3 नोव्हेंबर रोजी होणाऱया अध्यक्षीय निवडणुकीपूर्वी पहिली लस बाजारात उपलब्ध होईल, असे त्यांचे म्हणणे आहे.
पेरू : 31 ऑक्टोबरपर्यंत आणीबाणी
संसर्गाच्या दुसऱया लाटेनंतर पेरूमधील राष्ट्रीय आणीबाणी 31 ऑक्टोबरपर्यंत वाढविण्यात आली आहे. आणीबाणी वर्षाच्या अखेरपर्यंत राहण्याची शक्यता असल्याचे अध्यक्ष मार्टिन विजकारा यांनी म्हटले आहे. काही निर्बंधांमुळे लोकांना मोठा त्रास होत असल्याचे जाणत असल्याचे आरोग्य मंत्रालयाने म्हटले आहे.
ऑस्ट्रेलिया : आणखी एकाचा राजीनामा
व्हिक्टोरिया प्रांताचे आरोग्य मंत्री जेनी मिकाकोस यांनी राजीनामा दिला आहे. क्वारेंटाईन सुविधेसाठी हॉटेल्सना कंत्राट दिल्याचे आणि त्यात मोठय़ा प्रमाणावर गैरवहार झाल्याचा आरोप त्यांच्यावर होता. याचबरोबर संसर्ग नियंत्रणप्रकरणी त्यांच्या अपयशाला प्रसारमाध्यमांनी ठळकपणे मांडले होते.
रियो कार्निव्हल टळले
ब्राझील आणि जगात प्रसिद्ध रियो डि जेनेरियो येथील कार्निव्हल सध्या टाळण्यात आले आहे. 100 वर्षांच्या इतिहासात पहिल्यांदाच असा निर्णय घेण्यात आला आहे. यंदा याचे आयोजन होण्याची शक्यता अत्यंत कमी आहे. ब्राझीलमध्ये 46 लाख बाधित असून 1 लाख 40 हजारांहून अधिक जणांना जीव गमवावा लागला आहे. रियो कार्निव्हलचे आयोजन सांबा स्कूलकडून केले जाते. कोविड-19मुळे हे आयोजन टाळत असल्याचे त्यांच्याकडून सांगण्यात आले आहे.
कोरोनाचे भाषेशी चकित करणारे कनेक्शन
अमेरिकन इंग्रजी न बोलणाऱयांना कोरोना होण्याचा धोका पाचपट अधिक : 31 हजार कोरोनाबाधितांवर झालेल्या संशोधनातून दावा
अमेरिकेच्या वैज्ञानिकांनी कोरोना आणि भाषा यांच्यातील कनेक्शन शोधून काढले आहे. या संशोधकांनुसार अमेरिकन इंग्रजी न बोलणाऱयांना कोरोना होण्याचा धोका अधिक आहे. अमेरिकेत पहिली भाषा स्पॅनिश किंवा कंबोडियन असलेल्या लोकांमध्ये कोरोनाचा संसर्ग होण्याचा धोका पाचपट अधिक आहे.
यासंबंधीचा दावा युनिव्हर्सिटी ऑफ वॉशिंग्टन स्कुल ऑफ मेडिसीनने स्वतःच्या संशोधनात केला आहे. संशोधनासाठी 300 मोबाइल क्लीनिकल आणि 3 रुग्णालयांमध्ये आलेल्या कोरोनाबाधितांच्या चाचणीची आकडेवारी जमविण्यात आली होती.
भाषानिहाय रुग्ण
कोरोनाच्या 31 हजार रुग्णांवर 29 फेब्रुवारी ते 31 मे या कालावधीत संशोधन करण्यात आले. यात 18.6 टक्के बिगरइंग्रजी भाषिक होते. तर केवळ 4 टक्के इंग्रजी बोलणारे अमेरिकन नागरिक होते. संशोधकांनुसार कंबोडियन ही प्रथम भाषा असणाऱया समुहात बाधितांचा आकडा 26.9 टक्के होता. तर स्पॅनिश आणि एम्फेरिक बोलणाऱया समुहात हे प्रमाण 25.1 टक्के होते. इंग्रजी बोलणाऱयांमध्ये केवळ 5.6 टक्के अमेरिकन बाधित झाले. याचबरोबर जे अनेक प्रकारची भाषा बोलायचे, अशा समुहात 4.7 टक्के जणांना कोरोनाची लागण झाली आहे. चिनी भाषा बोलणाऱयांमध्ये हा आकडा 2.6 टक्के होता. अरबी आणि कोरियाई भाषा बोलणाऱया समुहात अनुक्रमे 2.8 टक्के आणि 3.7 टक्के जणांचा चाचणी अहवाल पॉझिटिव्ह आला होता.
ब्रिटनमध्ये कोरोनाचा वर्णभेद
नॅशनल हेल्थ सर्व्हिसेसच्या मे महिन्यातील आकडेवारीनुसार ब्रिटनमध्ये कोरोना संसर्ग आणि त्यातून होणाऱया मृत्यूचा सर्वाधिक धोका कृष्णवर्णीय, आशियाई आणि अल्पसंख्याकांना आहे. संसर्गाच्या प्रकरणांमध्ये हाच कल दिसून आला आहे. श्वेतवर्णीयांच्या तुलनेत बिगरश्वेतवर्णीयांमध्ये संसर्गानंतर मृत्यूचा आकडा दुप्पट आहे. आकडेवारीनुसार 1 हजार लोकांवर 23 ब्रिटिश, 27 आशियाई आणि 43 अश्वेत लोकांचा मृत्यू झाला आहे. 1 हजार लोकांमागे 69 मृत्यूंसह सर्वाधिक धोका कॅरेबियन लोकांना होता.