प्रतिनिधी / कोल्हापूर
कोल्हापुरात कोरोनाचा पहिला बळी गेला असून जिल्ह्याची चिंता वाढली आहे. इचलकरंजीतील 60 वर्षीय वृद्धाचा आज छत्रपती प्रमिलाराजे सर्वोपचारी रुग्णालयात मृत्यू झाला. या रुग्णाच्या संपर्कात आलेल्या चौघा नातेवाईकांवर इचलकरंजीतील आयजीएम रुग्णालयात उपचार सुरू असून त्यांची प्रकृती स्थिर आहे.
गेल्या दहा दिवसांपूर्वी इचलकरंजीतील 60 वर्षीय वृद्ध कोरोनाची लक्षणे आढळल्याने इचलकरंजीतील आयजीएम रुग्णालयात दाखल झाली होती. तेथे स्वॅब घेऊन तपासणीसाठी पाठवले होते. मिरज येथील प्रयोगशाळेतून रुग्णाचा अहवाल पऑजिटिव्ह आला होता. मधुमेहाचा त्रास असल्याने त्यानंतरच्या उपचारासाठी त्यांना कोल्हापुरातील सीपीआर रुग्णालयात दाखल करण्यात आले होते. सुरुवातील तीन दिवस त्यांची प्रकृती स्थिर होती. मात्र, त्यानंतर श्वास घेण्यात अधिक त्रास जाणवू लागला. त्यामुळे गेल्या दोन दिवसांपासून त्यांना व्हेंटिलेटरवर ठेवण्यात आले होते. मात्र, त्यांच्याकडून उपचारांना प्रतिसाद मिळाला नाही. अखेर आज सायंकाळी त्यांचा मृत्यू झाल्याचे सीपीआरमधील वैद्यकीय सूत्रांनी सांगितले.
दरम्यान, इचलकरंजीत कोरोनाचा पहिला बळी गेल्याने वस्तनगरी हादरून गेली आहे.