प्रतिनिधी / पेठ वडगाव
गेल्या दोन दिवसापूर्वी पुण्यावरून आलेल्या येथील एका युवतीला कोरोना झाल्याचे स्पष्ट झाले आहे. कोरोनाग्रस्त युवतीला हातकणंगले कोव्हिड सेंटरमध्ये उपचारासाठी दाखल करण्यात आले आहे. तर तिच्या आई-वडिलांसह संपर्कातील आलेल्या एका नातेवाईकाला येथील अलगीकरण कक्षात ठेवण्यात आले आहे.
येथील आंबा रोडवरील एका कुटूंबातील युवती पुणे येथे नोकरीस आहे. गेल्या शनिवारी मध्यरात्री ही युवती आपल्या सख्या भावाला घेऊन येथे आली होती. दरम्यान, भाऊ परत पुण्याला गेला. सकाळी चहा नाष्टा करून तरुणीच्या आरोग्य तपासणीसाठी तिचे वडील व चुलत भाऊ मोटारी मधून अतिग्रे येथील कोव्हिड सेंटरवरती गेले होते. यावरती या तरुणीचा घशातील स्वॅब तपासणीसाठी घेतला होता. रविवारी रात्री तिचा रिपोर्ट कोरोना पॉझिटिव्ह आला.
यामुळे वडगाव शहरात भीतीचे वातावरण पसरले आहे. पालिका प्रशासनाने परिसर निर्जंतुकीकरण केला आहे. प्रशासनाने कोरोनाग्रस्त युवतीच्या आई, वडील व एका नातेवाईकाला अलगीकरण कक्षात पाठविण्यात आले आहे. दरम्यान, अंबप येथेही एक इसम कोरोना पॉझिटीव्ह आला आहे.