प्रतिनिधी / पेठ वडगाव
पेठ वडगाव शहरात आज पाच कोरोना रुग्णांची भर पडली. वडगाव शहरात यामुळे कोरोना रुग्णांची संख्या १६६ झाली आहे. आज आलेल्या कोरोना पॉझिटिव्ह रुग्णामध्ये एका माजी उपनगराध्यक्षाचा समावेश आहे. गेल्या दोन दिवसापूर्वी त्यांच्या पत्नीचा रिपोर्ट कोरोना पॉझिटिव्ह आला होता. यानंतर या कुटुंबातील तिघांचे रिपोर्ट पॉझिटिव्ह आले आहेत.
पेठ वडगाव शहरात दिवसेंदिवस कोरोना रुग्णांमध्ये वाढ होवू लागली असून नागरिकांनी खबरदारी घेण्याचे आवाहन पालिका व पोलीस प्रशासन करत आहे. नागरिकांनी खबरदारी घेण्याची गरज यामुळे व्यक्त होत आहे. श्वसनाचे त्रास असलेल्या रुग्णांना व्हेंटीलेटर बेड उपलब्ध होण्यासाठी नातेवाईकांची धावपळ उडत आहे. भाजीपाला विक्रेते, सराफ व्यावसाईक, किराणा दुकानदार, बँक कर्मचारी, राजकीय व्यक्ती कोरोना पॉझिटिव्ह येत आहेत. यामुळे शहराची कोरोना विस्फोटाकडे वाटचाल सुरु असल्याची भीती व्यक्त होत आहे. वडगाव शहर परिसरासाठी सुरु होणार असलेले कोविड सेंटर लवकरात लवकर सुरु होण्यासाठी खासदार धैर्यशील माने यांनी जिल्हा प्रशासनास सूचना देण्याची मागणी नागरीकातून होत आहे.