वार्ताहर/उचगाव
लॉकडाऊन असतानाही वळीवडे (ता. करवीर) येथे विक्रीसाठी गावठी दारूचा साठा करणाऱ्या तरुणावर गुन्हा दाखल करण्यात आला. बंडू विठ्ठल मोहिते (वय ३०, सध्या रा. वळीवडे, मूळ रा. मिनचे सावर्डे, ता. हातकणंगले) असे या तरुणाचे नाव आहे. यावेळी पोलिसांनी त्याच्याकडून १२ हजार रुपयांचा गावठी दारूचा मुद्देमाल जप्त केला.
याबाबत पोलीस नाईक आकाश पाटील यांनी दिलेल्या फिर्यादीत म्हटले आहे, की बंडू मोहिते याने तीस लिटर गावठी दारू वळीवडे येथील अमर माने यांच्या घराच्या आडोशाला विक्रीसाठी साठा करून ठेवली. याबाबत गांधीनगर पोलिसांना माहिती मिळताच त्यांनी मोहितेवर कारवाई केली. त्याच्याकडून १२ हजार रुपयांचा गावठी दारूचा मुद्देमाल जप्त केला असून त्याच्यावर गांधीनगर पोलीस ठाण्यात गुन्हा दाखल करण्यात आला आहे.