प्रतिनिधी / कोल्हापूर
मिमिक्री आर्टिस्ट, निवेदक आणि शाहीर म्हणून लौकिक संपादन केलेले हरहुन्नरी कलाकार आणि साळोखेनगरमधील शिवशक्ती हायस्कूलमधील प्रयोगशाळा सहाय्यक अरुण गंगाराम शिंदे (वय 58, रा. दादू चौगले नगर, सुर्वे नगरजवळ) यांचे सोमवारी कोरोनाने निधन झाले. त्यांच्या पश्चात पत्नी, मुलगा, दोन मुली, जावई, नातवंडे असा परिवार आहे.
गेली पंचवीस वर्षे शाहीरी कलेला वाहून घेतलेल्या शिंदे यांच्या निधनाने एक अष्टपैलू कलाकार काळाच्या पडद्याआड गेला आहे. शिंदे यांनी शाहीरविशारद डॉ. आझाद नायकवडी यांच्या शाहीरी पथकात अडीच दशके शाहिरी कलेची सेवा केली. शिंदे मिमिक्रीतून रसिकांना मनमुराद हसवित असत. नाकाव्दारे सनई वादन करण्यातही ते पारंगत होते. अनेक कार्यक्रमांचे सूत्रसंचालक, निवेदक म्हणूनही त्यांनी जबाबदारी पाडली होती.