खरेदीसाठी कॅम्प परिसरात खवय्यांची होतेय गर्दी
प्रतिनिधी / बेळगाव
पावसाला सुरुवात झाली की खवय्यांना आठवण होते ती खेकडय़ाच्या झणझणीत रश्श्याची आणि मसाला खेकडय़ांची. मागील आठवडय़ात जिल्हय़ात झालेल्या पावसानंतर शहरामध्ये खेकडय़ांची आवक वाढली आहे. शुक्रवारी मोठय़ा प्रमाणात खेकडे बाजारात दाखल झाल्याने खरेदीसाठीही खवय्यांची गर्दी उसळली होती.
पावसाळी काळय़ा खेकडय़ांना विशेष मागणी आहे. पावसाला सुरुवात होताच बेळगाव परिसरात असणाऱया नद्या, तलाव, धरणांच्या काठांवर खेकडे उपलब्ध होतात. खेकडय़ांची आवक वाढते. बेळगावमधील कॅम्प येथील फिश मार्केटसमोर आणि खासबाग बसवेश्वर सर्कल येथेही काही प्रमाणात खेकडय़ांची विक्री केली जाते. पहिल्या पावसानंतर खेकडे खरेदीसाठी नागरिकांची तुफान गर्दी होत असते.
खेकडय़ांचे दर
बेळगाव बाजारात येणारे खेकडे हिडकल जलाशय तसेच घटप्रभा नदीकाठ परिसरातून येतात. दिवसभर खेकडे विक्री करून हे लोक संध्याकाळच्या बसने पुन्हा गावी परततात. आकाराप्रमाणे खेकडय़ांचे दर आकारले जातात. मोठे खेकडे 100 रुपयाला 3 तर लहान खेकडे 100 रुपयांना 5 ते 10 याप्रमाणे विक्री केले जात होते.