प्रतिनिधी/ खेड
तालुक्यात बेकायदेशीररित्या वाळूची वाहतूक करणारे चार डंपर ताब्यात घेण्यात आले आहेत. येथील पोलिसांनी ही धडक कारवाई केली. हे चारही डंपर गोळीबार मैदानात उभे करण्यात आले आहेत. अवैधरित्या वाळूची वाहतूक सुरू असल्याची कुणकुण लागताच पोलीस निरीक्षक सुवर्णा पत्की यांच्या मार्गदर्शनाखाली पोलीस पथकाने सापळा रचला. त्यानुसार चार डंपर वाळूची वाहतूक करत असल्याचे निदर्शनास आल्यानंतर चारही ट्रक वाळूसह जप्त करण्यात आले. लाखो रूपये किंमतीची वाळू डंपरमध्ये असल्याचे पुढे आले आहे. याप्रकरणी सायंकाळी उशिरापर्यंत चौघांवर गुन्हा दाखल करण्याची प्रक्रिया सुरू होती. याबाबतचा अधिक तपशील उपलब्ध होऊ शकला नाही. पोलिसांच्या धडक कारवाईने बेकायदेशीररित्या वाळूची वाहतूक करणाऱया व्यावसायिकांचे धाबे दणाणले आहेत.