पुणे / प्रतिनिधी :
अखिल ब्राह्मण मध्यवर्ती संस्था (नाशिक) पुणे केंद्र संस्थेच्या ४७ व्या वर्धापनदिनानिमित्त विविध क्षेत्रात उल्लेखनीय कार्य केलेल्या मुलाखतकार सुधीर गाडगीळ, पार्श्वगायक जितेंद्र अभ्यंकर आणि कलाकार धनश्री काडगांवकर यांना पुरस्कार जाहीर झाला आहे. पुरस्कार वितरण सोहळा रविवार, दिनांक ५ जानेवारी रोजी सायंकाळी ४. ४५ वाजता नारायण पेठेतील केसरी वाडयाच्या लोकमान्य सभागृहात होणार आहे, अशी माहिती अखिल ब्राह्मण मध्यवर्ती संस्था (नाशिक) पुणे केंद्राचे प्रमुख मकरंद माणकीकर यांनी पत्रकार परिषदेत दिली.
मकरंद माणकीकर म्हणाले, यंदाचा विशेष पुरस्कार मुलाखतकार सुधीर गाडगीळ, संगीत सेवा पुरस्कार पार्श्वगायक जितेंद्र अभ्यंकर, रंगकर्मी पुरस्कार तुझात जीव रंगला फेम धनश्री काडगांवकर यांना प्रदान करण्यात येणार आहे. याशिवाय १०१ वर्षाचे सोपानराव कालेकर यांना उद्योग आदर्श रत्न पुरस्कार देऊन गौरविण्यात येणार आहे. तर, डीआरडीओ चे शास्त्रज्ञ व्यंकटेश परळीकर यांना देखील त्यांच्या क्षेत्रातील उल्लेखनीय कार्याबद्दल सन्मानित करण्यात येईल.