ऑनलाईन टीम / मुंबई :
महाराष्ट्रात काल पुन्हा एकदा कोरोना रुग्णांच्या संख्येत वाढ झालेली दिसून आली आहे. यासोबतच दैनंदिन मृत्यूची संख्या देखील वाढली आहे. मागील 24 तासात राज्यात 6 हजार 857 नवीन कोरोनाबाधित आढळले असून 6 हजार 105 रुग्णांना डिस्चार्ज देण्यात आला आहे. तर कालच्या दिवशी 286 रूग्णांचा मृत्यू झाला आहे.
राज्यात आजपर्यंत एकूण 60 लाख 64 हजार 856 कोरोनाबाधित रुग्ण बरे होऊन घरी परतले आहेत. तर आतापर्यंत 1,32,145 रुग्णांनी आपला जीव गमावला आहे. सध्या राज्यातील रुग्ण बरे होण्याचे प्रमाण 96.53 टक्के इतके झाले आहे. सध्या राज्यातील मृत्यूदर 2.01 टक्के एवढा आहे.
दरम्यान, आजपर्यंत तपासण्यात आलेल्या 4,73,69,757 प्रयोगशाळा नमुन्यांपैकी 62,82,914 (13.26 %) नमुने पॉझिटिव्ह आले आहेत. सध्या राज्यात 4,88,537 व्यक्ती होमक्वारंटाईनमध्ये आहेत तर 3,364 व्यक्ती संस्थात्मक क्वारंटाईनमध्ये आहेत. राज्यात सद्य स्थितीत 82 हजार 545 ॲक्टिव्ह रुग्ण आहेत.
- मुंबई : रुग्ण दुप्पतीचा काळ 1383 दिवस
मुंबईत मागील 24 तासात 404 नवीन कोरोना रुग्ण आढळून आले. तर 382 रूग्णांना डिस्चार्ज देण्यात आला. तर कालच्या दिवशी 06 जणांचा मृत्यू झाला. त्यामुळे कोरोना रुग्णांची एकूण संख्या 7,35,165 वर पोहचली आहे. तर आतापर्यंत 15,795 जणांचा कोरोनामुळे मृत्यू झाला आहे. सध्या 5,280 रुग्णांवर उपचार सुरू आहेत.