महाराष्ट्राचं आराध्य दैवत छत्रपती शिवाजी महाराजांच्या सुवर्ण इतिहासातील आणखी एक सोनेरी अध्याय मोठय़ा पडद्यावर पहायला मिळणार आहे. लेखक-अभिनेता-दिग्दर्शक दिग्पाल लांजेकरच्या संकल्पनेतून उदयास आलेल्या शिवराज अष्टकातील ‘पावनखिंड’ या तिसऱया चित्रपटातील छत्रपती शिवाजी महाराजांचा लुक नुकताच रिव्हील करण्यात आला असून, पुन्हा एकदा शिवरायांच्या रूपात अभिनेता चिन्मय मांडलेकर झळकला आहे. ‘फर्जंद’ आणि ‘फत्तेशिकस्त’ या दोन चित्रपटांनंतर ‘पावनखिंड’साठी चिन्मयनं पुन्हा एकदा आपल्या मस्तकी शिवरायांचा जिरेटोप चढवला आहे.चित्रपटाच्या पोस्टरवर चिन्मयचं आजवर कधीही न दिसलेलं करारी रूप पहायला मिळत आहे. हुबेहूब शिवराय भासावेत असा पेहराव, भाळी कुमकुम तिलक, उजव्या हातात गनिमांवर तुटून पडणारी तलवार आणि पाठीमागे ज्वलंत हिंदुत्वाचा पुरस्कार करत मुसळधार पावसातही डौलानं फडकणारा भगवा झेंडा असं काहीसं शिवरायांचं चिन्मयरूप ‘पावनखिंड’च्या पोस्टरवर पहायला मिळतं. धो-धो कोसळणाऱया पावसात नेमकं काय घडलं?, शिवरायांच्या मागावर असणाऱया शत्रूचा कसा पराभव झाला? पोस्टरवर दिसणारे शिवराय नेमके कोणाशी दोन हात करत आहेत? या आणि अशा बऱयाच इतिहासकालीन प्रश्नांची उत्तरं ‘पावनखिंड’
चित्रपटात मिळणार आहेत.
एकदा नव्हे, दोनदा नव्हे तर चक्क तिसऱयांदा रुपेरी पडद्यावर छत्रपती शिवाजी महाराजांची भूमिका साकारण्याची संधी मिळण्याबाबत चिन्मय म्हणाला, पूर्व संचिताशिवाय छत्रपती शिवाजी महाराजांची व्यक्तिरेखा वाटय़ाला येणं शक्य नाही. लागोपाठ तीन चित्रपटांमध्ये महाराजांची भूमिका साकारायला मिळणं हे मी माझं भाग्यच मानतो. दिग्पाल यांना माझ्यामध्ये छत्रपती शिवाजी महाराजांची छबी दिसली आणि त्यानं ते शिवरूप यशस्वीपणे रसिकांसमोरही सादर केलं हे खूप महत्त्वाचं आहे. ‘पावनखिंड’मध्ये बाजीप्रभू देशपांडे आणि बांदल सेनेने स्वराज्य आणि महाराजांच्या रक्षणाकरीता दिलेल्या अमूल्य बलिदानाची सुवर्णगाथा पहायला मिळणार आहे.