प्रतिनिधी/ चिपळूण
शहरात कोरोनाच्या वाढत्या प्रादुर्भावामुळे नगर परिषदेच्या माध्यमातून घरोघरी जाऊन सर्वेक्षण करण्याचे काम सुरू करण्यात आले आहे. गेल्या 2 दिवसांत 1366 कुंटुबांचे सर्वेक्षण झाले असून यासाठी आमदार शेखर निकम यांनी दिलेल्या साहित्याचा मोठा फायदा होत आहे. या सर्वेक्षणासाठी 13 पथके तयार करण्यात आली असून या सर्वेची नोंद गुगल ऍपवरही होत आहे. आणखी काही दिवस ही मोहीम चालणार आहे.
मार्च महिन्यापासून सुरू झालेल्या कोरोनाच्या संकटावर सुरूवातीला शहराने चांगली मात केली होती. काही दिवस मागे जाता कोरोनामुक्त असलेल्या शहरात आता वेगाने प्रादुर्भाव होत असल्याचे दिसत आहे. शहरातील विविध भागातील 155 जणांना आतापर्यंत कोरोना झाला असून त्यातील 83 जण बरे झाले आहेत, तर 69 जणांवर कामथे रूग्णालय, पेढांबे येथील कोविड सेंटरमध्ये उपचार सुरू आहेत. तिघांचा मृत्यू झाला असून 88जण होमक्वॉरंटाईन आहेत. शहरात 39 कटेनमेन्ट झोन आहेत. त्यामुळे शहरातील साखळी तोडण्याबरोबरच रूग्ण संख्येला आळा घालण्यासाठी काही दिवसांपूर्वी प्रांताधिकारी प्रवीण पवार, तहसीलदार जयराज सूर्यवंशी, मुख्याधिकारी डॉ. वैभव विधाते, तालुका आरोग्याधिकारी डॉ. ज्योती यादव, नगर परिषदेतील सर्व गटनेते यांची बैठक झाली. बैठकीत शहरात घरोघरी जाऊन सर्वेक्षण करण्याचा निर्णय घेण्यात आला. त्यानुसार मुख्याधिकारी डॉ. विधाते, तालुका आरोग्याधिकारी डॉ. यादव यांच्या मार्गदर्शनाखाली आरोग्य कर्मचारी, आशा, नगर परिषद कर्मचारी यांची 13 प्रभागांसाठी 13 पथके तयार करण्यात आली असून त्याचे प्रमुखपद प्रभागातील नगरसेवकांना देण्यात आले आहे. या पथकातील प्रत्येकाला सुरक्षिततेचा उपाय म्हणून एन-95चे दोन मास्क, सॅनिटायझर, हॅण्डग्लोज, फेसशिल्ड, हॅन्डबॅग आदी साहित्य देण्यात आले आहे. सर्वेक्षणासाठी महत्वाचे असलेले 12 नॉन कॉन्टॅक्ट इन्फ्रारेड थर्मोमेटर्स व 15 ऑक्सो मीटर आमदार शेखर निकम यांनी स्वखर्चातून नगर परिषदेला दिले आहेत. त्याचा मोठा फायदा होत आहे.
ही पथके सकाळी 9 ते दुपारी 1 या वेळेत घराघरात जाऊन कोणाला ताप येत आहे का, ऑक्सिजन पातळी किती आहे, 55 वर्षावरील व्यक्ती किती आहेत, कोणाला गंभीर आजार आहेत, याची माहिती घेत असून त्यांना आर्सेनिक अल्बम-30च्या गोळय़ा देत आहेत. या सर्वेची नोंद महसूल विभागाकडून दिलेल्या गुगल ऍपवर होत आहे. त्यामुळे एकाच ठिकाणी सर्व माहिती मिळणे शक्य होणार आहे. हे सर्वेक्षण काटेकोरपणे करण्याच्या सूचना करण्यात आल्या असून यासाठी नागरिकांनी सहकार्य करावे, असे आवाहन मुख्याधिकारी डॉ. विधाते, प्रशासकीय अधिकारी प्रमोद ठसाळे, अनंत मोरे यांनी केले आहे.