वृत्तसंस्था / रिओ डे जेनेरिओ
चिली फुटबॉल संघातील आघाडीफळीत खेळणारा फुटबॉलपटू ऍलेक्सिस सांचेझ याच्या पायाला दुखापत झाल्याने तो आता कोपा अमेरिका फुटबॉल स्पर्धेतील होणाऱया प्राथमिक गटातील सामन्यात उपलब्ध होवू शकणार नाही.
शुक्रवारी चिली संघाचा सराव सुरू असताना सांचेझला पुन्हा या दुखापतीच्या वेदना जाणवू लागल्या. पायाच्या स्नायूना दुखापत झाल्याचे तपासणीवेळी आढळून आले. सांचेझला काही दिवस विश्रांती घ्यावी लागणार असल्याने तो चिली संघाबरोबर ब्राझीलला प्रयाण करू शकणार नाही. कोपा अमेरिका फुटबॉल स्पर्धेतील चिलीचा सलामीचा सामना बलाढय़ अर्जेंटिनाबरोबर सोमवारी रिओ डे जेनेरिओ येथे होणार आहे. त्यानंतर चिलीचे पुढील ब गटातील सामने बोलिव्हिया, पराग्वे आणि उरूग्वे यांच्याशी होणार आहेत.