मियागी
जपानमध्ये मागील अनेक आठवडय़ांपासून हिमवादळाने मोठे नुकसान घडवून आणले आहे. परंतु याचे सर्वात भयावह स्वरुप मंगळवारी दिसून आले. मियागी येथे एका महामार्गावर वादळामुळे दृश्यमानता खालावल्याने एकामागोमाग एक 130 हून अधिक वाहनांची परस्परांना धडक बसली आहे. या दुर्घटनेत एका व्यक्तीचा मृत्यू झाला असून सुमारे 17 जण जखमी झाले आहेत. टोहोकू द्रुतगती मार्गावर हिमवादळामुळे दृश्यमानता खूपच खालावली होती. याचमुळे खबरदारीदाखल कमाल वेग 50 किलोमीटर प्रतितास करण्यात आला होता. परंतु तरीही किमान 134 वाहने दुर्घटनाग्रस्त झाली आहेत. सर्वप्रथम एक ट्रक कारला जाऊन धडकला आणि त्यानंतर वाहनांच्या धडकण्याचे सत्रच सुरू झाले. महामार्गावर वाहतूक कोंडीमुळे किमान 200 जण अडकून पडले. घटनास्थळावरून ढिगारा हटविण्यासाठी 8 तासांचा कालावधी लागल आहे.