ऑनलाईन टीम / जम्मू :
जम्मू-काश्मीरमध्ये दहशतवाद्यांनी पीडीपी नेत्याच्या घरावर हल्ला केल्याची घटना समोर आली आहे. या हल्ल्यात पीडीपी नेत्याच्या खासगी सुरक्षा रक्षकाचा(पीएसओ) गंभीर जखमी झाले होते. त्यानंतर त्यांना रुग्णालयात नेले असता उपचारादरम्यान, त्यांचा मृत्यू झाला आहे. दरम्यान, हल्लेखोर दहशतवाद्यांना पकडण्यासाठी संपूर्ण परिसराची नाकेबंदी करून शोधमोहीम राबवली जात आहेे.
मध्य काश्मीरच्या श्रीनगर जिल्ह्यातील नाटीपोरा भागात सोमवारी सकाळी दहशतवाद्यांनी पीडीपी नेता हाजी परवेज अहमद यांच्या घरावर हल्ला केला. ज्यामध्ये त्यांचा खासगी सुरक्षा रक्षक मंजूर अहमद गंभीर जखमी झाला होता. दरम्यान, उपचारासाठी रुग्णालयात दाखल केले गेले असता, तिथे त्याचा मृत्यू झाला.
पीडीपी नेता परवेज यांनी सांगितले की, माझी मुले, वृद्ध आई आणि अन्य कुटुंबीय घरात होते. तेव्हा सकाळी तोंड बांधलेले दोन हल्लेखोर मुख्य दरवाज्यातून आत आले व त्यांनी पोलीस कर्मचाऱ्यांवर गोळीबार सुरू केला. यानंतर माझ्या पीएसओकडून देखील गोळीबार सुरू करण्यात आल्यावर हल्लेखोरांनी पळ काढला.