खेळाडूंची जात कुठली? हा प्रश्नही खरेतर कोणाच्या मनात उमटू नये. तथापि, जी जात नाही ती जात! असे म्हणतात ते खोटे नाही. ऑलिम्पिकमध्ये भारताची जगप्रसिद्ध बॅडमिंटन खेळाडू पी. व्ही. सिंधू हिने कास्यपदकाची कमाई केल्यानंतर इंटरनेटवरून तिची जात शोधण्याचा प्रयत्न अनेकांनी केल्याचे दिसून येत आहे.
गुगलने प्रसिद्ध केलेल्या माहितीवरून हा प्रकार उघडकीस आला आहे. गुगलवर आपण काय शोधतो? हे उघड होऊ शकते, याची कल्पना आता बऱयाच जणांना आली आहे. त्यामुळे थेट सिंधू हिची जात न शोधता तिच्या आडनावावरून त्या समाजाची जात शोधण्याचा प्रयत्न अनेकांनी केल्याचे दिसून येते. त्यामुळे स्वातंत्र्याचा अमृतमहोत्सव साजरा करण्याची वेळ आलेली असतानाही जात मात्र अनेकांच्या मनातून गेलेली नाही, हे यावरून स्पष्ट होते. आणखी एक उदाहरण म्हणजे भारतीय महिला हॉकी संघाने याच ऑलिम्पिक स्पर्धेत सामना गमावल्यानंतर एका खेळाडूच्या घराच्या अवतीभवती धिंगाणा घालण्यात आला. त्यावेळी तिला आणि तिच्या कुटुंबियांना जातीवरून काही टिप्पण्या ऐकविण्यात आल्या, असेही वृत्त आहे. ही देशविघातक प्रवृत्ती केव्हा जाणार, याचे उत्तर काळच देऊ शकेल.