रविवारी 8 नवे रुग्ण, सक्रिय रुग्णसंख्येतही घट
प्रतिनिधी / बेळगाव
रविवारी बेळगाव शहर व जिल्हय़ातील 402 जणांचे स्वॅब तपासणी अहवाल निगेटिव्ह आले आहेत. तर 8 नवे रुग्ण आढळून आले असून सक्रिय रुग्णांची संख्याही घटली आहे. यामध्ये बेळगाव शहर व उपनगरांतील पाच जणांचा समावेश आहे.
चिदंबरनगर, राणी चन्नम्मानगर, अंजनेयनगर, जक्केरीहोंडा, मलिकवाड, सौंदत्ती, अथणी, गोकाक येथे पॉझिटिव्ह रुग्ण आढळून आले आहेत. जिल्हय़ातील एकूण बाधितांची संख्या 26 हजार 704 वर पोहोचली असून त्यापैकी 26 हजार 250 जणांनी कोरोनावर मात केली आहे. अद्याप 1641 जणांचे अहवाल यायचे आहेत. आतापर्यंत 4 लाख 72 हजार 631 जणांची स्वॅब तपासणी करण्यात आली आहे. त्यापैकी 4 लाख 41 हजार 693 जणांचे अहवाल निगेटिव्ह आले आहेत. कोरोनामुळे आतापर्यंत 342 जण दगावले आहेत. अद्याप 30 हजारहून अधिक जण चौदा दिवसांच्या होमकेअरमध्ये आहेत. सक्रिय रुग्णांची संख्या 112 वर उतरली आहे. आता कोरोना विषाणूचा संसर्ग कमी होत असल्याने नागरिकांना दिलासा मिळाला आहे.