प्रतिनिधी / बेळगाव
मुळचे बेळगावचे सध्या कांदिवली मुंबई येथील रहिवासी ज्येष्ठ क्रिकेटपटू प्रकाश उर्फ बाबू नारायण खानापूरकर (वय 73) मंगळवार दि. 28 रोजी हृदयविकाराने दुःखद निधन झाले. त्यांच्या पश्चात पत्नी पल्लवी, मुंबई रणजी क्रिकेटपटु पराग खानापूरकर व सून राजश्री खानापूरकर असा परिवार आहे.
बाबू खानापूरकर यांचे शालेय शिक्षण ठळकवाडी स्कूल तर महाविद्यालयीन शिक्षण गोगटे कॉलेज ऑफ कॉमर्स महाविद्यालयात झाले. बाबू खानापूरकर यांनी शालेय शिक्षण घेत असताना ठळकवाडी स्कूलच्या क्रिकेट संघातून सराफ शिल्ड, चौगुले शिल्ट, लठ्ठे शिल्ड अशा प्रतिष्ठेच्या क्रिकेट स्पर्धेत त्यांनी आपल्या अष्टपैलू खेळाचे दर्शन घडविले होते.
महाविद्यालयीन शिक्षण पूर्ण झाल्यानंतर त्यांनी मुंबई येथील महाराष्ट्र स्टेट को-ऑपरेटीव्ह बँकेत नोकरी केली. यावेळी बाबू खानापूरकर यांनी मुंबई, गुजराथ, राजस्थान, कलकत्ता, पुणे, कोल्हापूर, सांगली, उगार खूर्द आणि बेळगाव येथे अनेक निमंत्रितांच्या क्रिकेट स्पर्धेत भाग घेऊन उपस्थित क्रिकेट शौकिनांची मने जिंकली होती.