ऑनलाइन टीम / मुंबई :
कोरोना लढय़ासाठी टाटा समूहाकडून 500 कोटींची मदत जाहीर करण्यात आली आहे. टाटा समूहाचे मालक रतन टाटा यांनी ट्विटद्वारे ही माहिती दिली.
याबद्दल माहिती देताना रतन टाटा यांनी आपल्या ट्विटर अकाउंटवर एक पत्र शेअर केले आहे. यामध्ये ते म्हणतात, यापूर्वीही देशावर संकटे आली. या संकटाच्या काळात टाटा समूहाने आपले योगदान दिले आहे. आताही कोरोना व्हायरसने देशाला ग्रासले असून सध्या भारताची स्थिती गंभीर आहे. या गंभीर काळात तातडीने कार्यवाही करणे गरजेचे आहे. त्यामुळे या लढाईत टाटा समूहाकडून वैद्यकीय साहित्य आणि अत्यावश्यक गरजांसाठी 500 कोटी रुपये जाहीर करत असल्याचे त्यांनी म्हटले आहे.