कुर्डुवाडी /प्रतिनिधी
दिवाळी सुटीसाठी आईवडिलांसह मामाच्या गावाला निघालेल्या लहानग्या शिवराजचा वाटेतच दुचाकी व टेम्पोच्या समोरासमोर झालेल्या अपघातात दुर्दैवी मृत्यू झाला. तर दुचाकीवरील त्याचे आई-वडिल जखमी झाले आहेत. ही घटना २९ तारखेला सायंकाळी ७ च्या सुमारास टेंभुर्णी-कुर्डुवाडी रस्त्यावर घडली.याबाबत दुचाकीस्वार शरद अनंता बोराडे (रा.उरळीकांचन ता.हवेली) यांनी कुर्डुवाडी पोलिसांत फिर्याद दिली आहे.
याबाबत अधिक माहिती अशी की फिर्यादी आपली पत्नी व दोन वर्षाच्या मुलासह उरळीकांचन हून मुलाच्या मामाच्या गावी माढा येथे दिवाळी सणाकरीता दुचाकी (क्र. एम .एच १२ क्यू/ क्यू / २७२१) वरुन निघाले होते. अवघ्या १८ कि.मी वर माढा असताना टेंभुर्णी – माढा रस्त्यावर कुर्डू नजीक सायंकाळी ७ वा सुमारास समोरून भरधाव वेगात येणाऱ्या अज्ञात टेम्पोच्या चालकाने फिर्यादीच्या दुचाकीला जोराची धडक दिली. यामध्ये फिर्यादीचा मुलगा शिवराज शरद बोराडे वय २ वर्षे हा गंभीर जखमी होऊन मयत झाला.तसेच फिर्यादी व त्याची पत्नी जखमी झाले आहेत. टेम्पो चालकाने त्यांना उपचारासाठी न नेता तेथून पळ काढला . बोराडे यांच्या फिर्यादीवरुन अज्ञात टेम्पोच्या अज्ञात चालकावर कुर्डुवाडी पोलिसांत गुन्हा दाखल झाला आहे. .