प्रतिनिधी / बेळगाव
भाग्यनगर, पाचवा क्रॉस येथील गृहिणी ट्विंकल विरल गांधी यांनी मागील काही दिवसांपासून परिसरातील नागरिक व पोलिसांना मोफत आयुर्वेदिक काढय़ाचे वितरण सुरू केले आहे. हा काढा पूर्णपणे आयुर्वेदिक असून यामुळे रोग प्रतिकारशक्ती वाढण्यास मदत होणार आहे. दररोज 60 ते 70 नागरिकांना काढय़ाचे त्या वितरण करीत आहेत.
त्या मूळच्या गुजरात येथील असून, तेथेही त्यांनी स्वयंसेवी संस्था सुरू केली आहे. बेळगाव परिसरात कोरोना रुग्णांच्या संख्येत वाढ होत असल्याने रोगप्रतिकारशक्ती वाढविण्यासाठी त्यांनी या काढय़ाचे वितरण सुरू केले आहे. पुदिना, दालचिनी, लिंबू, चहा पावडर, तुळस, आले या सर्वांचा वापर करून हा काढा तयार केला जात आहे. दररोज 30 ते 40 पोलिसांना हा काढा पोहोचविण्याचे काम त्या करीत आहेत.