दिल्लीत सध्या कोरोनापेक्षा अधिक चिंता डेंग्युची आहे. डेंग्यू रुग्णांच्या संख्येत मोठय़ा प्रमाणावर वाढ होत आहे. हा रोग डासांमार्फत पसरत असल्याने डास नियंत्रणासाठी आता दिल्ली प्रशासनाने ड्रोनचा उपयोग करण्याचा निर्णय घेतला आहे. ज्या ठिकाणी स्वच्छता कर्मचारी जाऊ शकत नाहीत. तसेच मानवी हाताने लारवा विरोधी द्रावणाची फवारणी होऊ शकत नाही, तेथे ड्रोनच्या साहाय्याने ही फवारणी करून डासांची उत्पत्ती नियंत्रणात ठेवण्याचे प्रयोग करण्यात येणार आहेत.
माणूस पोहोचू शकत नाही, अशा दुर्गम ठिकाणी डासांच्या उत्पत्तीवर नियंत्रण ठेवणे अशक्य असल्याने तेथेच मोठय़ा प्रमाणात डासांची निर्मिती होते आणि ते शहरभर पसरतात, असे दिसून आले आहे. त्यामुळे दिल्लीच्या तिन्ही महानगरपालिकांनी ड्रोनचा प्रयोग करण्याचा निर्णय घेतला आहे. तो यशस्वी झाल्यास डासांमुळे उत्पन्न होणाऱया मलेरिया किंवा डेंग्यूसारख्या आजारांवर नियंत्रण ठेवण्याचा एक सोपा मार्ग उपलब्ध होईल, अशी आशा आहे.