मंथनच्या यूटय़ूब चॅनेलवर होणार प्रसारित
प्रतिनिधी/ बेळगाव
मंथन कल्चरल ऍण्ड सोशल वेल्फेअर सोसायटी बेळगावतर्फे ‘कविवर्य कृ. ब. निकुंब : साहित्य आणि आस्वाद’ या विषयावर प्रा. डॉ. शुभदा शहा यांचे व्याख्यान होणार आहे. कृ. ब. निकुंब यांच्या जन्मशताब्दीनिमित्त दि. 22 डिसेंबर रोजी सायंकाळी 5 वा. मंथनच्या यूटय़ूब चॅनेलवर हे व्याख्यान होणार आहे.
मराठी साहित्याच्या काव्य दालनात आपल्या तरल काव्याने समृद्धी आणणारे कृ. ब. निकुंब यांचा जन्म 9 ऑगस्ट 1920 रोजी झाला. मुंबई विद्यापीठातून त्यांनी एम. ए. पदवी घेतली. अंतिम परीक्षेत न. चि. केळकर सुवर्णपदक व चिपळूणकर पारितोषिकाचे ते मानकरी होते.
बेळगावच्या लिंगराज महाविद्यालयात मराठी विभागाचे प्रमुख व मराठीचे प्राध्यापक म्हणून ते कार्यरत होते. उज्ज्वला, अनुबंध, साहाय्य साखर, पंख, पल्लवी, मृगावर्त, अभ्र हे त्यांचे काव्यसंग्रह प्रसिद्ध आहेत. फणसाचे पान व पारख काव्ये हे त्यांचे समीक्षा संग्रह प्रसिद्ध आहेत. रसिकांनी याचा लाभ घेण्याचे आवाहन संयोजकांनी केले आहे.