ऑनलाईन टीम / मेक्सिको सिटी :
ड्रग्ज तस्करांचे संशयास्पद विमान मेक्सिकोमधील क्विंटाना रू प्रांतात एका महामार्गावर उतरले. हायवेवर उतरताच हे विमान जळून खाक झाले.
संशयास्पद असलेले हे विमान दक्षिण अमेरिकेतून आले होते. मेक्सिकोच्या हवाई हद्दीमध्ये शिरल्यापासून या विमानावर लक्ष ठेवण्यात आले होते. हे छोटे विमान मेक्सिकोमधील क्विंटाना रू प्रांतातील एका महामार्गावर उतरले. हे विमान महामार्गावर उतरत असतानाच विमानाने पेट घेतला होता. महामार्गावर उतरल्यावर विमान जळून खाक झाले.
ज्या महामार्गावर विमान जळाले तेथून थोड्याच अंतरावर सुरक्षा रक्षकांना एका पिक अप ट्रकमध्ये कोकेनने भरलेली 13 पोती आढळून आली. या पोत्यांचे एकूण वजन 850 पौंड म्हणजेच 390 किलो आहे. त्यावरून जळालेले विमान ड्रग्ज तस्करांचे असण्याची शक्यता वर्तवण्यात आली आहे. युकातन पोलीस या घटनेचा तपास करत आहेत.