प्रतिनिधी/ सातारा
गेले अनेक वर्षापासून पार्किंगचा प्रश्न गंभीर बनलेल्या सातारा तहसिलदार कार्यालयात सोमवारी नो पार्किंग झोन लागू झाला. दोन दिवसापासून वाहनधारक या नियमांचे पालन करत आहेत. यामुळे तहसिलदार कार्यालयाने मोकळा श्वास घेतला आहे.
सातारा तहसिलदार कार्यालयात नियोजनाअभावी पार्किंगची समस्या भेडसवत होती. कार्यालयात शहरातून तसेच ग्रामीण भागातून दररोज हजारो लोक कामानिमित्त येत असतात. यावेळी दुचाकी, चारचाकी वाहने अस्थावस्थ पद्धतीने उभी करण्यात येत होती. यामुळे कार्यालयातील रस्ते अरुंद झाले होते. यांचा नाहक त्रास इतर वाहन धारकांना सोसावा लागत होता. कार्यालयातील अधिकायांच्या प्रवेशद्वारापर्यंत वाहने उभी करण्यात येत होती. काही दिवसांनी ही समस्या आणखी गंभीर होऊ नये म्हणून नो पार्किंग झोन करण्याचा निर्णय तहसिलदार आशा होळकर व प्रांतधिकारी मिनाज मुल्ला यांनी घेतला. यांची अंमलबजावणी सोमवार पासून सुरु झाली. याच पार्श्वभूमी दोन दिवसापासून वाहनधारकांनी कार्यालयाच्या बाहेरील आवारात गाडय़ा पार्किंग केल्या आहेत. फक्त अधिकारी, कर्मचारी यांच्या वाहनांना प्रवेश दिला जात आहे. यामुळे कार्यालयाने मोकळा श्वास घेतला.