तिरुपती :
आंध्रप्रदेशातील सुप्रसिद्ध तिरुमला मंदिरातील तब्बल 140 जणांचे कोरोना अहवाल पॉझिटिव्ह आल्याने खळबळ निर्माण झाली आहे. बाधित रुग्णांमध्ये मंदिरातील काही पुजाऱयांचा समावेश असल्याचे देवस्थानचे कार्यकारी अधिकारी अनिल कुमार सिंघल यांनी स्पष्ट केले आहे. मंदिरात कडक सुरक्षा व्यवस्था आणि उपाययोजना असूनही कोरोनाचा संसर्ग झपाटय़ाने पसरत असल्याने चिंता व्यक्त केली जात आहे. धोका वाढत असल्याने मंदिरातील कर्मचारी संघटना व राजकीय पक्षांकडून सध्या काही दिवस मंदिरातील दर्शन बंद करण्याची मागणी होत आहे. शुक्रवारी मंदिर ट्रस्टकडून पुजाऱयांची एक बैठक आमंत्रित करून आरोग्यविषयक सूचना करण्यात आल्या. अनलॉक-1 अंतर्गत 8 जूनपासून तिरुपती बालाजी मंदिर उघडण्यात आले होते. 11 जूनपासून सर्वसामान्यांसाठी दर्शन सुरू करण्यात आले होते. सध्या मंदिरात दररोज 8 ते 9 हजार भाविक दर्शनासाठी येत आहेत.