वृत्तसंस्था / गांधीनगर
गुजरातमध्ये बुधवारी झालेल्या दोन वेगवेगळय़ा अपघातात 15 जणांचा दुर्दैवी मृत्यू झाला. बडोदा येथे वाघोडिया क्रॉसिंग महामार्गावर बुधवारी पहाटे 2 ट्रकमध्ये झालेल्या भीषण धडकेत 11 जणांचा मृत्यू झाला असून 17 जण जखमी झाले. तसेच सुरेंद्रनगर जिल्हय़ातील कोठारिया गावाजवळ चालकाचे वाहनावरील नियंत्रण सुटल्याने झालेल्या दुर्घटनेत 4 जणांचा मृत्यू झाला आहे. अपघातातील जखमींना तातडीने रुग्णालयात दाखल केले आहे. या दुर्घटनांबद्दल गुजरातचे मुख्यमंत्री विजय रुपाणी यांच्यासह पंतप्रधान नरेंद्र मोदी, गृहमंत्री अमित शहा यांनी दु:ख व्यक्त केले आहे. बडोदा येथे झालेल्या भीषण अपघातानंतर महामार्गावर मोठी वाहतूक कोंडी निर्माण झाली होती. या दुर्घटनेबद्दल गुजरातचे मुख्यमंत्री विजय रुपाणी यांनी ट्विट करत ‘बडोदाजवळ रस्ते अपघातामुळे मृत्यू झाल्याचे ऐकून दु:ख होत आहे. जखमींवर उपचार सुरू असून ते लवकरात लवकर बरे व्हावेत. तसेच मृत्यू झालेल्यांच्या आत्म्यास शांती लाभो, अशी मी प्रार्थना करतो’ असे म्हटले आहे.