ऑनलाईन टीम / नवी दिल्ली :
‘द काश्मीर फाइल्स’चे दिग्दर्शक विवेक अग्निहोत्री यांना केंद्रीय गृह मंत्रालयाने ‘वाय’ दर्जाची सुरक्षा दिली आहे. त्यामुळे अग्निहोत्री यांच्या सुरक्षेसाठी सीआरपीएफचे 11 जवान तैनात असणार आहेत. अग्निहोत्री यांना संपूर्ण भारतभरात ही सुरक्षा पुरवली जाणार आहे.
‘द काश्मीर फाईल्स’ हा चित्रपट काश्मिरी पंडितांच्या पलायनावर आधारित असून, यात काश्मिरी पंडितांवर झालेले अत्याचार दाखवण्यात आले आहेत. हा चित्रपट पाहून अनेकजण भावुक झाले. एकीकडून या चित्रपटाला पाठिंबा मिळत असला तरी दुसरीकडे या चित्रपटाला मोठ्या प्रमाणात विरोध होत आहे. सोशल मीडियावरून अग्निहोत्री यांना धमक्या येऊ लागल्या आहेत. दरम्यान, या चित्रपटाच्या पार्श्वभूमीवर सुरु असणारा वाद लक्षात घेत अग्निहोत्री यांना केंद्राने वाय दर्जाची सुरक्षा दिली आहे.