घटप्रभा येथील एसबीटी पियु कॉलेजमधील घटना
प्रतिनिधी / बेळगाव
निवडणूक कर्तव्यावरील एका साहाय्यक पोलीस उपनिरीक्षकाचा (एएसआय) हृदयाघाताने मृत्यू झाला आहे. शुक्रवारी घटप्रभा येथील एसबीटी पियु कॉलेजमध्ये ही घटना घडली आहे.
जगदीश बसवंताप्पा पुजेरी (वय 57, मूळचा रा. बैलहोंगल) असे त्या एएसआयचे नाव आहे. जगदीश पुजेरी हे यमकनमर्डी पोलीस स्थानकात सेवा बजावत होते. त्यांची पत्नी बैलहोंगल येथे शिक्षिका आहे. सध्या निवडणूक कर्तव्यावर त्यांची नियुक्ती करण्यात आली होती.
मतदान केंद्रांना भेटी देताना घटना
बेळगाव लोकसभा मतदारसंघाच्या कार्यक्षेत्रातील गोकाक विधानसभा मतदारसंघात त्यांची नियुक्ती झाली होती. मतदान केंद्रांना भेटी देताना घटप्रभा येथील एसबीटी पियु कॉलेजमध्ये ते बाथरुमला गेले. बाथरुम बाहेरच हृदयाघाताने त्यांचा मृत्यू झाल्याचे जिल्हा पोलीसप्रमुख लक्ष्मण निंबरगी यांनी सांगितले. या घटनेमुळे हळहळ व्यक्त होत आहे.