ऑनलाईन टीम / नवी दिल्ली :
पंतप्रधान नरेंद्र मोदींनी मार्च 2015 ते नोव्हेंबर 2019 या 5 वर्षांच्या काळात 58 देशांचे दौरे केले. या दौऱ्यांवर एकूण 517.82 कोटी रुपये खर्च झाल्याची माहिती सरकारने मंगळवारी संसदेत दिली.
राष्ट्रवादी काँग्रेसच्या राज्यसभेतील खासदार फौजिया खान यांनी पंतप्रधान मोदींनी मागील पाच वर्षात किती परदेश दौरे केले आणि त्यासाठी किती खर्च झाला याची माहिती मागवली होती. त्यावर परराष्ट्र राज्यमंत्री व्ही. मुरलीधरन यांनी लेखी उत्तर दिले. मुरलीधरन यांनी म्हटले आहे की, पंतप्रधान मोदी यांच्या 2015 पासून ते आतापर्यंतच्या दौऱ्यावर 517.82 कोटी रुपये खर्च झाला. मोदींच्या दौऱ्यामुळे द्विपक्षीय, क्षेत्रीय आणि वैश्विक मुद्द्यांवर भारताच्या दृष्टीकोनाबाबत इतर देशांना माहिती मिळाली. तसेच इतर देशांची भारताचे संबंध आणखी दृढ झाले.
भारताने अनेक देशांशी करार केले. यामध्ये व्यापार, गुंतवणूक, संरक्षण यासह मोठ्या क्षेत्रात सामंजस्य करारही झाले आहेत. त्यामुळे कोरोना संकटात जपान, अमेरिका, फ्रान्स, जर्मनी, इस्त्राईलकडूनही भारताला मदत मिळाली आहे. भारतानेही 150 देशांना औषधे, वैद्यकीय उपकरणांची मदत केली आहे.