नामिबियाचा स्पर्धेतील पहिला विजय, रुबेल टम्पेलमनचे पहिल्याच षटकात 3 बळी
अबु धाबी / वृत्तसंस्था
पदार्पणवीर नामिबियाने आयसीसी टी-20 विश्वचषक स्पर्धेतील लो-स्कोअरिंग लढतीत स्कॉटलंडविरुद्ध 4 गडी राखून लक्षवेधी विजय संपादन केला. आयर्लंड व नेदरलँड्सला नमवून सुपर-12 फेरीसाठी पात्रता संपादन केलेल्या नामिबियाने स्कॉटलंडला 8 बाद 109 धावांवर रोखले आणि प्रत्युत्तरात 19.1 षटकात 6 गडय़ांच्या बदल्यात 115 धावांसह विजयावर शिक्कामोर्तब केले.
डावखुरा मध्यमगती गोलंदाज रुबेन ट्रम्पेलमनने पहिल्याच षटकात चक्क 3 फलंदाज बाद करत जोरदार धक्के दिले आणि स्कॉटलंडचा संघ यातून शेवटपर्यंत सावरु शकला नाही. वास्तविक, नामिबियाने सहज विजय संपादन करणे कठीण नव्हते. पण, स्कॉटिश फिरकी त्रिकुट ख्रिस ग्रीव्हज, मार्क वॅट व मायकल लेस्क यांनी नामिबियाच्या फलंदाजांवर अंकुश ठेवण्यात उत्तम यश संपादन केले. डेव्हिड व्हिएझने (15 चेंडूत 16) फटकेबाजी केल्यानंतर जेजे स्मिथने (23 चेंडूत नाबाद 32) नामिबियातर्फे विजयाचे सोपस्कार पूर्ण केले.