सांगली प्रतिनिधी
येथील उत्तर शिवाजीनगर परिसरातील महापालिकेच्या आरसीएच सेंटरसमोर वीज वितरणच्या मुख्य लाईनला स्पर्श झाल्याने पीव्हीसी पाईप घेऊन जाणाऱ्या भारत गॅस कंपनीच्या आयशर मालमोटारीला भीषण आग लागली. पाठीमागून येणाऱ्या याच कंपनीच्या दुसऱ्या गाडीच्या चालकाने संबंधित मालमोटार चालकाला आग लागण्याचे सांगितले. चालकांने तात्काळ गाडी थांबवत गाडीतून उडी मारली. महापालिका अग्निशमन विभागाच्या दोन गाड्यानी घटनास्थळी धाव घेऊन आग आटोक्यात आणली. मंगळवारी दुपारी पावणे दोनच्या सुमारास हा प्रकार घडला. आगीत पाईप पूर्णपणे जळून गेल्या. तसेच मालमोटारचेही काही प्रमाणात नुकसान झाले. आगीत कोणतीही जीवितहानी झाली नाही.