ऑनलाईन टीम / पुणे :
पुणे-मिरज लोहमार्गावर देखभाल-दुरुस्ती, सिग्नलिंग आणि दुहेरीकरणाची कामे सुरू असल्याने 9 फेब्रुवारीपासून सुरू होणाऱया पुणे-बेळगाव जनशताब्दी एक्स्प्रेसची तारीख हुकण्याची शक्यता सूत्रांनी वर्तवली आहे.
जनशताब्दी एक्स्प्रेस ही गाडी 9 फेब्रुवारीपासून दररोज धावेल व त्याचे उद्घाटन पुणे स्टेशनवर करण्यात येईल, अशी माहिती रेल्वे सूत्रांनी यापूर्वी दिली होती. रेल्वे राज्यमंत्री सुरेश अंगडी यांनी देखील या वृत्ताला दुजोरा दिला होता. मात्र, पुणे-मिरज लोहमार्गावर गेल्या महिनाभरापासून देखभाल-दुरुस्ती, सिग्नलिंग, ओएचई तसेच दुहेरीकरणाची कामे सुरू आहेत. परिणामी कोयना एक्स्प्रेस रद्द तर पुणे-कोल्हापूर, पुणे-सातारा डेमू अंशतः रद्द करण्यात आल्या आहेत. तसेच अनेक लांब पल्ल्याच्या गाडय़ांचे वेळापत्रक कोलमडले असून दररोज या गाडय़ांना दोन-तीन तासांचा विलंब होत आहे. याच पार्श्वभूमीवर पुणे-बेळगाव जनशताब्दी एक्सप्रेस सुरू केल्यास तिला देखील दररोज विलंब होईल व क्वचितप्रसंगी ती रद्द देखील केली जाऊ शकते.