श्रीनगर / वृत्तसंस्था
जम्मू काश्मीरमध्ये पुलवामा सेक्टरमध्ये सुरक्षा दल आणि दहशतवाद्यांमध्ये झालेल्या चकमकीत सुरक्षा दलाने तीन दहशतवाद्यांचा खात्मा केला आहे. बुधवारी पहाटे करण्यात आलेल्या कारवाईनंतर दिवसभर सदर भागात शोधमोहीम सुरू होती. काही दहशतवादी पुलवामा सेक्टरमध्ये लपून बसल्याची माहिती गुप्तचर विभागाकडून भारतीय सुरक्षा दलाला मिळाली होती. त्याआधारे स्थानिक पोलिसांसह लष्कराने परिसरात शोधमोहीम राबवत बेधडक कारवाई केली. सुरक्षा दलाकडून कारवाई सुरू झाल्याची कुणकूण लागताच दहशतवाद्यांनी बचावासाठी गोळीबार केला. प्रत्युत्तरादाखल सुरक्षा दलाने केलेल्या गोळीबारात तीन दहशतवादी ठार झाल्याची माहिती सुरक्षा दलाने दिली.