ऑनलाईन टीम / कल्याण :
लखनऊ-मुंबई पुष्पक एक्सप्रेसमध्ये इगतपुरी ते कसारादरम्यान सात ते आठ दरोडेखोरांनी ट्रेनमध्ये घुसून प्रवाशांना लुटले. तसेच धावत्या ट्रेनमध्ये एका 20 वर्षीय प्रवाशी तरुणीवरही या नराधमांनी बलात्कार केल्याची धक्कादायक घटना शुक्रवारी रात्री घडली. याप्रकरणी कल्याण जीआरपी पोलिसांनी दोन दरोडेखोरांना ताब्यात घेतले असून, त्यांच्या इतर साथीदारांचा पोलीस शोध घेत आहेत.
लखनऊ-मुंबई पुष्पक एक्सप्रेस शुक्रवारी संध्याकाळी सहाच्या सुमारास इगतपुरी स्टेशनला पोहोचली. इगतपुरी स्थानकातून मुंबईच्या दिशेने सुटताना ट्रेन स्लो होती. ही ट्रेन स्टेशनजवळच्या बोगद्याजवळ पोहचताच सात ते आठ दरोडेखोर ट्रेनमध्ये चढले. त्यांनी 15 ते 20 प्रवाशांना मारहाण करत त्यांचे मोबाईल आणि पैसे हिसकावून घेतले. त्यानंतर एका प्रवाशी महिलासोबत दरोडेखोरांनी छेडछाड केली. तसेच 20 वर्षीय तरुणीवर धावत्या ट्रेनमध्ये या नराधमांनी बलात्कार केल्याची माहिती मिळत आहे. काही धाडसी प्रवाशांनी दोन दरोडेखोरांना पकडून ठेवले. ट्रेन कल्याण स्थानकात येताच पोलिसांनी या दरोडेखोरांना पोलिसांच्या ताब्यात दिले. उर्वरित आरोपींचा पोलीस शोध घेत आहेत.