नवी दिल्ली / वृत्तसंस्था
पेट्रोलियम कंपन्यांनी गुरुवारी इंधन दरात किरकोळ कपात केली. पेट्रोल दरात प्रतिलिटर 16 पैसे तर डिझेलमध्ये 14 पैशांची कपात केली आहे. सलग पंधरा दिवस इंधनाचे दर स्थिर ठेवल्यानंतर तेल कंपन्यांनी ही कपात केली आहे. ताज्या दरकपातीनंतर दिल्लीतील पेट्रोलचे प्रतिलिटरचे दर 90.56 रुपयांवरून 90.40 रुपयांपर्यंत खाली आले आहेत. तर डिझेल दर 80.87 रुपयांवरून 80.73 रुपयापर्यंत उतरले आहेत. मुंबईमध्ये पेट्रोल 96.82 तर डिझेल 87.81 रुपयांपर्यंत खाली आले आहेत. जागतिक बाजारात कच्च्या तेलाच्या दरात फेरबदल झाल्यामुळे इंधन दरात कपात केली आहे. वाढत्या इंधन दरवाढीमुळे सर्वसामान्य जनता त्रस्त झाल्याने देशभरात संतापाचे वातावरण होते. फेबुवारी महिन्यापर्यंतच्या दरवाढीनंतर गेल्या काही दिवसात इंधन दरात तीनवेळा कपात झाली आहे. या कपातीद्वारे पेट्रोल दरात 61 पैशांची तर डिझेल दरात 60 पैशांची कपात झाली आहे.