नवी दिल्ली / वृत्तसंस्था
सरकारी तेल कंपन्यांनी रक्षाबंधनाच्या दिवशी सर्वसामान्यांना दिलासा दिला आहे. रविवारी पेट्रोल आणि डिझेल दोन्ही इंधनाचे दर 20 पैसे प्रतिलिटरने स्वस्त झाले. या कपातीनंतर दिल्लीत 1 लिटर पेट्रोलची किंमत 101.64 रुपये आणि डिझेलची किंमत 89.07 रुपये झाली आहे. गेल्या आठवडाभरात डिझेलच्या दरात झालेली ही चौथी दरकपात असून पेट्रोलच्या दरात गेल्या महिन्याभरात पहिल्यांदाच किरकोळ कपात झाली आहे. गेल्या आठवडाभरात डिझेल प्रतिलिटर 60 पैशांनी स्वस्त झाले आहे.
कच्च्या तेलाच्या किमतीत घसरण झाल्यामुळे देशांतर्गत बाजारातही इंधन दरात घसरण दिसून येत आहे. सध्या बेंट क्रूडने 4 महिन्यांचा नीचांक गाठल्यामुळे पेट्रोलियम कंपन्यांनी इंधन कंपन्यांनी दरकपात केल्याचे दिसून येत आहे. सध्या देशभरातील सुमारे 19 राज्यांमध्ये पेट्रोलची किंमत 100 रुपयांच्या पुढे गेली आहे. मध्यप्रदेश, राजस्थान, महाराष्ट्र, आंध्रप्रदेश, तेलंगणा, कर्नाटक, ओडिशा, जम्मू काश्मीर आणि लडाख येथे पेट्रोल शंभरीपार पोहोचलेले आहे.