दोन मोटरसायकली हस्तगत
पेठ वडगाव / प्रतिनिधी
मोटरसायकल चोरी करणारा दीपक तुकाराम वाघमारे (वय ३२ ,रा टाकळे वसाहत, चिकूर्डे ता वाळवा, जि. सांगली) याला वडगाव पोलिसांनी शिताफीने अटक केली. सराईत चोरट्याकडून दोन मोटरसायकल पोलिसांनी हस्तगत केल्या.
या बाबत पोलिसातून घेतलेली माहिती अशी की, वाठार तर्फ वडगाव येथील ब्रिज खाली लावण्यात आलेली सुनील जाधव यांची मोटरसायकल चोरी झाली. तर बुवाचे वाठार येथील एका घरासमोरून मोटरसायकल चोरीस गेली होती. या मोटरसायकल चोरी अज्ञातांनी केल्याची फिर्याद वडगाव पोलीस ठाण्यात झाली होती.
जिल्हा पोलीस अधीक्षक शैलेश बलकवडे, कोल्हापूर अप्पर पोलीस अधीक्षक तिरुपती काकडे, गडहिंग्लज कॅम्प अप्पर पोलीस अधीक्षक जयश्री गायकवाड, डीवायएसपी रामेश्वर वैंजने, पोलीस निरीक्षक संतोष घोळवे यांच्या मार्गदर्शनाखाली सहाय्यक फौजदार दीपक पोळ, पोलीस अंमलदार दादा माने,पोलीस कॉन्स्टेबल योगेश राक्षे, संदीप गायकवाड, प्रमोद चव्हाण या पथकाने संशयितरित्या फिरत असलेला दीपक वाघमारे याला ताब्यात घेतले.
या चोरट्याकडे कसून चौकशी केली असता त्याने वाठार व बुवाचे वाठार येथील मोटरसायकल चोरी केल्याची कबुली दिली. पोलिसांनी दोन मोटरसायकली जप्त करण्यात आले असून अधिक तपास पोलीस फौजदार दीपक पोळ करीत आहेत.