मुंबई/प्रतिनिधी
सध्या भाजपा प्रदेशाध्यक्ष चंद्रकांत पाटील हे विदर्भ दौऱ्यावर आहेत. “पोपटाचा प्राण सत्तेमध्ये आहे!; पाठीत खंजीर खुपसणाऱ्या शिवसेनेला धडा शिकविण्यासाठी मुंबई महानगरपालिका जिंका आणि महाराष्ट्रात एकहाती सत्ता आणा, हेच एकमेव उत्तर आहे.” असं म्हणत भाजप प्रदेशाध्यक्ष चंद्रकांत पाटील यांनी आज पुन्हा एकदा शिवसेनेवर निशाणा साधला. तसेच, यावेळी त्यांनी शिवसेना खासदार अरविंद सावंत यांना जाहीर आव्हान देखील दिलं. भाजपा पदाधिकाऱ्यांना मार्गदर्शन करताना चंद्रकांत पाटील म्हणाले की, अरविंद सावंत यांनी भाजपाची मदत न घेता मुंबईत खासदार होऊन दाखवावं, असं जाहीर आव्हान देखील त्यांनी यावेळी दिलं. याचबरोबर, यापुढे भाजप आपल्यासोबत प्रामाणिकपणे राहिलेल्यांच्या आधारे व संघटन वाढवून सरकार आणेल. असं देखील यावेळी चंद्रकांत पाटलांनी बोलून दाखवलं.
सध्या भाजपा प्रदेशाध्यक्ष चंद्रकांत पाटील हे विदर्भ दौऱ्यावर आहेत. यावेळी पदाधिकाऱ्यांना मार्गदर्शन करताना ते म्हणाले की, “यापुढे भाजप आपल्या बरोबर प्रामाणिकपणे राहिलेल्या, आरपीआय, राष्ट्रीय समाज पक्ष, रयत क्रांती संघटना, शिवसंग्राम, जनसुराज्य या पक्षांच्या आधारे आणि संघटन वाढवून आम्ही आमच्या जीवावर सरकार आणू. मध्यप्रदेश, राजस्थान, गुजरातमध्ये आम्हाला कोणता पक्ष लागत नाही. त्यामुळे यापुढे विश्वासघात पुरे. काय होतं यांचं विदर्भात, काय अस्तित्व होतं शिवसेनेचं मराठवाड्यात? प्रमोद महाजन, गोपीनाथ मुंडे, भाऊसाहेब फुंडकर यांनी हाताला धरून आणलं. जागांचं वाटप केलं, जागा विजयी केल्या, असं म्हणत पाटील यांनी शिवसेनेवर जोरदार हल्लाबोल केला.