प्रतिनिधी / सातारा :
पोवईनाका येथील लाटकर पेढेवाले यांच्या दुकानासमोरून दुचाकीवरून निघालेल्या अरूण धनराज गुजले (वय 24, रा. वेळे कामथी ता. सातारा) याला दुचाकीवरून येणाऱ्या दोन अज्ञातांनी कट का मारला अशी विचारणा करत मारहाण केली. तसेच त्याच्या दुचाकीच्या डिकीत असणारे 1 लाख 56 हजार रूपये लुटले. अवघ्या काही मिनिटांमध्ये घडलेल्या थरारक घटनेने परिसर हादरुन गेला असुन भर दिवसा घडलेल्या प्रकारामुळे नागरिकांमध्ये भीतीचे वातावरण निर्माण झाले आहे.
पोलिसांनी दिलेल्या माहितीनुसार, अरुण धनराज गुजले हे एका खासगी कंपनीत काम करत आहेत. शुक्रवारी सकाळी 11.15 च्या सुमारास ते बँकेत पैसे भरण्यासाठी दुचाकीवरुन निघाले होते. दुचाकी पोवई नाक्यावर आल्यानंतर लाटकर पेढेवाले दुकानासमोर त्यांना दोन अज्ञात युवकांनी अडवले. आमच्या दुचाकीला कट का मारला, अशी विचारणा करत मारहाण केली. यावेळी एकाने धनराज यांच्या गाडीची डिकी उघडून त्यात ठेवलेले 1 लाख 56 हजार एवढी रोख रक्कम घेऊन तेथून पलायन केले. ही बाब धनराज यांच्या लक्षात आल्यानंतर त्यांनी आरडाओरडा केला. परंतु संशयित तेथून पसार झाले. ही संपूर्ण घटना सीसीटीव्हीमध्ये कैद झाली आहे. त्यानुसार पोलीस तपास करत आहेत.