औंध / वार्ताहर :
इंदिरा गांधी स्टेडियम नवी दिल्ली येथे झालेल्या 34 व्या अखिल भारतीय पोस्टल कुस्ती स्पर्धेत 79 किलो वजनगटात फ्रीस्टाइल प्रकारात पोस्ट खात्यातील महाराष्ट्र सर्कलच्या चंद्रशेखर सर्जेराव शिंदे यांनी कांस्यपदक पटकावले.
केंद्र शासनाच्या 25 वर्षाच्या सेवेत खात्याअंतर्गत स्पर्धेत तब्बल 25 वे पदक मिळवून त्यांनी एक अनोखा विक्रम रचला आहे. शिंदे मूळचे वाई तालुक्यातील पांडेवाडीचे आहेत. महाराष्ट्र राज्य कुस्तीगीर परिषदेचे वरीष्ठ उपाध्यक्ष सर्जेराव शिंदे यांचे सुपूत्र आहेत.
महाराष्ट्र राज्य कुस्तीगीर परिषदेचे तांत्रिक अधिकारी व सोशल मीडिया टीमचे मार्गदर्शक, भारतीय शैली कुस्ती महासंघाचे सहसचिव आणि सुमो फेडरेशन ऑफ इंडियाचे प्रमुख म्हणून ते काम पाहत आहेत. त्यांच्या यशाबद्दल कुस्तीगीर परिषदेचे अध्यक्ष खा.शरद पवार, कार्याध्यक्ष नामदेवराव मोहिते, सरचिटणीस बाळासाहेब लांडगे, वरिष्ठ उपाध्यक्ष सर्जेराव शिंदे यांनी अभिनंदन केले आहे.