पाचगाव/प्रतिनिधी
पोस्टल कॉलनी पाचगाव येथे बुधवारी सकाळी तीन कोरोना पॉझिटिव्ह रुग्ण आढळले. पोस्टल कॉलनी मधील एका कुटुंबांमधील पती-पत्नी आणि त्यांच्या चार वर्षे मुलगीचा बुधवारी सकाळी कोरोनापॉझिटिव्ह अहवाल आला आहे. यामुळे पोस्टल कॉलनी परिसरात खळबळ उडाली आहे. या कुटुंबीयांचे वाघबीळ येथे हॉटेल आहे. या हॉटेलच्या व्यवसायानिमित्त ते वाघबीळ येथे जात असत. दोन दिवसापूर्वी या कुटुंबीयांचा कोरोना तपासणीसाठी स्वँब दिला होता. तो पॉझिटिव आला आहे.
पाचगाव ग्रामपंचायतीच्या वतीने या परिसरात औषध फवारणी करण्यात आली आहे. तसेच हा परिसर सील करण्यात आला आहे. कणेरी प्राथमिक आरोग्य केंद्राचे डॉक्टर पी. जे. चोपडे, पाचगावचे सरपंच संग्राम पाटील यांनी ग्रामस्थांना घाबरून न जाता आपल्या आरोग्याची काळजी घेण्याचे आवाहन केले आहे. पाचगाव मध्ये आज अखेर एकूण सहा कोरोना पॉझिटिव्ह रुग्ण आढळले आहेत.