प्रतिनिधी / कुर्डुवाडी
प्रसूतीसाठी लाचेची मागणी करणाऱ्या कुर्डुवाडी ग्रामीण रुग्णालयाचे वैद्यकीय अधीक्षक डॉ.संतोष आडगळे याला ९ हजारांची लाच स्वीकारताना लाचलुचपत प्रतिबंधक विभागाच्या पोलिस निरीक्षक कविता मुसळे यांच्या पथकाने रंगेहाथ पकडले. ही कारवाई शुक्रवार दि.२९ रोजी सकाळी ग्रामीण रुग्णालय कुर्डुवाडी येथे करण्यात आली.
याबाबत सविस्तर माहिती अशी की, तक्रारदाराच्या पत्नीला प्रसूतीकरीता ग्रामीण रुग्णालय कुर्डुवाडी येथे दाखल करण्यात आले होते. यावेळी येथील वैद्यकीय अधीक्षक डॉ. संतोष अडागळे याने प्रसूतीसाठी १० हजार रुपयांची लाचेची मागणी केली होती. मात्र तडजोडीनंतर शुक्रवारी सकाळी ९ हजार रुपये देण्याचे ठरले.
यानंतर तक्रारदाराने लाचलुचपत विभागाला याबाबत माहिती दिली. त्यानुसार लाचलुचपत विभागाने सापळा रचून प्रसूतीकरीता डॉ. अडागळे याला ९ हजारांची लाच घेताना रंगेहाथ पकडले. ही कारवाई लाचलुचपत विभागाच्या पोलिस निरीक्षक कविता मुसळे, पोलिस कॉन्स्टेबल उमेश पवार, पोलिस कॉन्स्टेबल स्वप्निल संकी यांनी केली. याबाबत गुन्हा दाखल करण्याची प्रक्रिया सुरु आहे.