नवी दिल्ली / वृत्तसंस्था
यंदाची प्रीमियर बॅडमिंटन लीग स्पर्धेची सहावी आवृत्ती पुढील वर्षापर्यंत लांबणीवर टाकण्याचा निर्णय आयोजकांनी जाहीर केला. कोव्हिड-19 च्या संकटामुळे आरोग्य व खेळाडूंची सुरक्षितता या बाबी लक्षात घेत आपण हा निर्णय घेतला असल्याचे त्यांनी नमूद केले. जागतिक स्तरावरील सर्वाधिक बक्षीस रकमेसाठी ओळखली जाणारी ही स्पर्धा पूर्वनियोजित रुपरेषेप्रमाणे मागील आठवडय़ापासून दिल्ली, मुंबई व पुणे येथे खेळवली जाणे अपेक्षित होते. या स्पर्धेची पाचवी आवृत्ती यापूर्वी दि. 20 जानेवारी ते 9 फेब्रुवारी या कालावधीत चार शहरात संपन्न झाली आहे. यंदा मार्चमध्ये ऑल इंग्लंड ओपन स्पर्धा झाल्यानंतर फक्त डेन्मार्क ओपन ही एकमेव बॅडमिंटन स्पर्धा या हंगामात होऊ शकली आहे.